屬靈長輩

返左工真係冇以前咁多心力去打blog,
放假通常都係週圍去,
見下朋友,補下習,陪下家人,
話咁快兩日假期就完晒..
仍然係有思考的時間及空間,
但係精神上的確比以往疲憊,
今日總算有時間打返篇長少少既blog…
想提及一下我的其中兩位屬靈長輩
係我的信仰成長中,他們佔有一個頗重要的位置.

我的第一個長期事奉是做青十的組長,
如果唔係有參與呢一項事奉,
我應該唔會對信仰有咁多反思..
新先生唔算係每時每刻都同我一齊面對成長的挑戰..
(畢竟佢有幾年去左讀書..)
係呢幾年,我同佢主要都係談及信仰在生命的意義..
無論係做組長的煩惱,定係人生的選擇上,
佢都幫助我去做不少重要的決定..

佢同我好似,都係感性+悲觀型..
亦因為咁, 我都幾相信佢的一些看法..
老實說,我真係忘記晒大部份佢同我講過的事.
我只係好記得當年佢鼓勵我要投資在永恆,
而不是一些沒有永恆價值的事情上....
呢句野到依家都仲好影響緊我..

至於另一位, 其實理論上我伙唔會同佢有太多既交集的,
但又好奇妙地我有機會同佢有一些傾深入對話既時間,
佢係我中學&大專的師姐,唔知有冇機會做"神同" ??
佢鼓勵我去參加獻身營,報課程等等,
我都一一去做左(或將會做)..
而係過程中,我又係當中經歷到好多好正的事情..
係最後一次的長談中,佢介紹我睇很多對佢有重要影響的著作,
我也很渴望能夠好好運用這些資源呢..
我希望能透過呢D野幫助我去思想未來的人生方向..
我的野望,好似一早係度打過了吧.. 仲有六年半就到了..
我好想好想到時會有一個答案..

點解要特別提及佢地兩個?
其實係有特別原因的..
我發覺,每次佢地邀請我去某些場合,
我總會係當中搵到多一點的信仰..
(其實都幾屈機...)
無論是在watoto表演,短宣分享會,又或者探訪長者..
我都會看見天父對我說話..
"我看到靈魂中的憂傷，我看到孤獨中人在角落裡顫抖"
呢一句,到依家仍然深深地影響住我..
就是在那次短宣分享會, 我知道我的生命中有一D野係我沒法割捨的..
責任卻已經託付我了..

人生能夠有屬靈長輩扶持, 並不是一件必然的事..
我很幸福, 每一個青十的組長都同我同行過一段很長的時間.
我所受的照顧,比大部份組員都多..
其實我一直都有個心願,就係要令我的組員都盡量經歷到被關心,被支持..
原因正正係因為我擁有過...
保羅那份心懷,真係不是老作的...
我feel到的...

黎緊,又一段時間唔會見到佢地兩個....
但願再見面時,我會變得更成熟,
更了解自己的野望..