轉載 ： 跟誰說加油

「加油！」係一句我由細到大，成日都會講既說話。以前細細個唔識嘢既時候，我會懶醒咁以為，「加油！」係一句正面到不得了既說話，講出嚟，唔會錯得去邊的，所以得閒無事跟人講幾句「加油」，斷估都唔會有咩蝕底，而且仲疑似幾大方得體咁。到踏進社會日子長了，就漸漸明白到，任何一句說話，都可以有正、反之分的。一句表面正面到爆既說話，面對唔同既對象、唔同既場合，會有完全唔同既解讀。當我反省自己年輕既時候，點解講話總係得罪人多稱呼人少時，發覺原因往往都只係自己太過喜歡自作聰明。

講「加油」，有時係會撞板的。例如放工前一刻我交落一大堆工作俾班同事做，然後「善意」地跟同事們講句「加油！」，自己轉頭就輕輕鬆鬆放工閃人。待我轉身離開，怕且同事們必定喪鬧我呢個hihi老闆。我有理由相信，響我準備離開office前既一刻，如果我省卻咗果句「加油！」，我所受到既指罵，應該會少三幾句的。

同人講「加油」，我覺得係有condition的；並唔能夠話，單單想一個人「做好啲」，「加油！」呢句說話，就可以隨便講得出口的。講「加油」既condition，必須係你已經認同咗，對方正在進行既事情既「方向」。例如我地會對一個準備參加比賽，正在努力操練既運動員講「加油」以示鼓勵。我地認同運動員為參加比賽而「努力操練」呢個方向。「加油」係鼓勵你響呢個已認同既方向之上，再努力、再堅持一啲。

所以，個關鍵係，你必須要認同佢既「方向」，你先有條件跟對象講一句「加油」。正如你冇可能對一個罪犯講「加油」的，邏輯上，果句「加油」變相係鼓勵佢在同一個方向之上更努力。一句「加油」並唔會被理解為希望佢「做好啲」既說話，而係代表鼓勵佢犯更多、更嚴重既罪行。

我忽然諗，十年八載之後，假如有一日我響屋企無意中發現剛踏入青春期既孩子響度睇AV，咁我又應唔應該同佢講聲「加油」？

「加油！」，表面上係句正面既話，但實際上，都唔係可以隨便講的。要同一個人講加油，如果理由係因為佢份工難做壓力大，我覺得冇問題的；唔judge佢做得好唔好，而跟佢講加油，我覺得都冇問題。但係如果連佢做決定背後既原因同動機，都唔去考慮，就同佢講加油，咁就似乎唔多妥了。特別係有權力在手既人，每個決定背後既動機同原因，主宰著事情發展既方向。如果連方向都唔嘗試去搞清楚，我地憑乜嘢去同人講「加油」？