放工 : 食飯，上堂

1) 能夠同你地傾下童年回憶互相抽下對方水，絕對係工作一週後最好既休息。約朋友食飯，倒不如說約出黎見面傾計，交流近況訴下苦，咁又過一晚。特別係同最忙好友，實在太少太少機會同你講無聊野。。

2)我真係好掛住啲細路，聽住A要升中，B成績有進步，C番學好開心。。。小朋友的成長彷彿成為了我喜樂的一個泉源。幾時先會再同你地一齊睇比卡超同分享零食？

3)開始左上楊醫的課，我諗我應該仲專心過以前返學。感恩能夠跟一位謙虛而又知識廣博的老師學習。創造與人生有何關係？佢既講解好似係我眼前打開左另一個世界。依加既我都幾適合聽呢個topic，嘿嘿。我都幾想考到中神張證書。。最好就係六年內完成啦~時間真係好唔夠！

返工? 返工!

 

話咁快已經返左工一個半月啦..

其實我都唔知應該點形容自己的狀態.

先講好的方面,

我感恩神比我搵到呢一份工,竟然比我入到去做..

無論係返既工作以及待遇都超過我的所想所求..

我開始左係office推行我的麥皮大計..為左keep fit而努力.

此外,我一次都冇遲過到,每朝都會定時定候自動彈起身..

而D同事都對我幾好...我又幾鐘意份工既job nature & 間公司

但係,我仍然覺得好大壓力.. 

 

首先,我仲未好適應自己身份上的轉變..

呢一個半月我與唔同既人/party 嘈左幾次..

我意識到心理上我有D壓力係被抑制住,

終於係呢段日子爆發出黎...

另一方面,我好怕做錯野..好怕阿頭問我做乜D野整得唔好..

我好似對自己既辨事能力失去信心..

之前我都覺得自己算係幾細心,

但一處於一個相對講求速度&追求零錯誤的環境,

我完全覺得自己epic fail…

另一樣我留意到既係我特別想見朋友&家人..

我會用盡我的放工時間&假期去見佢地..

星期五先見完一班frd,星期日又會去見沈佳宜..

心底裡,我有一份深深的無力感...

我知自己帶住什麼的理想心願入職場,

我亦不希望成為一條咸魚..

而我係靈命上亦一直都穩步上揚,

但係,我mentally 真係覺得有D辛苦..

樣樣野都要去學...

MPF, 保險, 投資, 辦公室文化, 營商環境 .......

一時之間,我好似接受唔到咁多資訊..

 

仲有既係,一D責任亦一窩蜂咁一擁而上..

我唔係好識點去面對..

有時返到屋企,真係攰到散左..

睇陣rss 沖個涼傾幾句計,又想搵D時間睇下工作相關既野..

之後話咁快又到十二點..

成個氣氛都係好壓迫, 想搵個空間抖陣氣都好難..

我呢排都走左出海邊兩次, 好明顯我係有好重壓力..

呢幾日係公司, 我係咁同神講  "救命呀爸爸 ,我好像快要喪命了.."

個種徬徨驚恐 真係好得人驚...

在一切的表象以後,有一份恐懼隱藏其中,

我怕冇左份工.. 我怕會冇左份工..

 

有D人會講"係咁架啦"..

我知佢冇惡意,但我真係好唔鐘意..

咁樣同係我身上插多兩刀有乜分別??

我已經夠痛...都係想搵手支持下姐..

 

有時會諗,既然份工係天父比我,

點解我唔相信佢會保守我?

但係心中的陰霾仍然係充斥住我的內心..

我諗呢一年應該係我最勤力祈禱的一年...

除左同神講,我都唔知應該點同人講/表達..

我的指望在哪裡呢？ 我的指望在乎你...

轉載 : 陶傑 - 做個好人

香港蘋果日報 2013年6月29日

美國電影「雷霆救兵」是不朽的鉅構。不只講戰爭的殘酷，而且引起一場人性的爭論。

戲中主角米勒隊長，奉命領一支九個士兵的分隊，深入法國戰場，把一個失蹤了的小兵雷恩找回來。槍林彈雨的敵陣，用九條精兵的人命去救一個小兵，值不值得？連米勒自己也很抗拒。但是，雷恩有三兄弟，都參加了美軍，兩個哥哥都陣亡了。國家為了體恤英雄的母親，萬不可以讓第三個兒子也犧牲，所以國家向米勒交付任務，不惜代價，也要把小雷恩找回來。米勒帶着同袍，深入敵陣，在休息的時候，有一場辯論。米勒講起自己的身世，入伍之前，他當過教師，從來沒想到過會身陷如此處境。「這個叫雷恩的人，我不認識他，對於我，只是一個名字，跟我完全無關。但是這是一項任務，我只知道，完成了任務，我就可以回家跟老婆團聚了，所以，我不是在救一個素無交情的人，而是完成任務。」

換了一個庸手，米勒這個主角，必然愛國、激情、有同胞戰友的大愛，是個完美的大英雄。但是湯漢斯演的這個隊長不一樣：他滿肚子氣，他沒有什麼大理想，他只想早點收工、回家，他不把雷恩當做一個人，他把他當成任務。

最後，人救出來了，米勒犧牲了他的隊員，自己也重傷。他垂死之際，捉着雷恩的手，說：我們一支分隊，都為救你而死光了。你要令我們這九個人犧牲得有價值。你要答應我們：你活着出去以後，你這輩子做個好人。雷恩答應了。幾十年之後，老來的雷恩夫婦，來為米勒上墳。他與太太相擁，問她：「告訴我，我是個好人嗎？」

她握緊老伴的手，說：「對，你是個好人。」這是影史上最動人的結局之一，做一個好人，不是要做總統、CEO、億萬富豪，要求很低，也很普通，甚至有點俗氣。但是，這是人生最基本的道德主題。太多人想做所謂的「成功人士」，名利雙收，就是成功人士了，但不一定是個好人。

做個好人，不是叫你四方討好，八面玲瓏，個個不得罪，而是善良、誠實、美好，不存害人之心，對弱小富有憐憫之心。做個好人，要有所堅持，嫉惡如仇，與罪惡的人和事勢不兩立，絕不同流合污。

在一個紛愚的亂世，有幾多個人做到這一樣呢？做成功人士容易，做個「老好人」也容易，做個真正的好人卻最難。「雷霆救兵」是偉大的作品，因為偉大的作品在最平凡之處，體現了勇毅和智慧。這齣戲令人終生難忘，因為許多人忘記了人生的基本，追尋善和美，一切貴在純真，做一個好人。

2013. 七一遊行

今日終於係幾個鐘頭試晒咩叫日曬雨淋...
好彩有帶密實袋裝住部電話..
但係最屈機既係咁差既天氣都有咁多人去!!
大部份既路程我都係跟住學民班後生仔行,
行既過程中見到唔同既群體/組織都努力咁同途人分享佢地既理念/想法.
東北發展,動物警察,大氣電波發展,環保及保育.....
點解當權者好似完全睇唔到呢D訴求,仲話自己做得好好,唔會自滿?

 

Of the people, by the people,for the people.

學民，政治

自從上年八月開始留意學民思潮的年青人,
睇住佢地努力咁為自己的社會去奮鬥同爭取,
個下都會問自己: 我係度做緊乜?

今日係灣仔天橋見到班學生係度向途人宣傳佢地既理念,
個下我除左走上前講聲加油之前,
我都唔知可以點好..

我唔係話一定要投身政治舞台先叫好,
而係我睇到呢班年輕人個團火,
佢地唔係講一句"社會係咁架啦"就算數,
反而試圖去抗爭.
嘗試用合理的方式實踐心目中理想的宏願.

大學畢業,係咪就代表人生慢慢朝向謝晒皮前進?
我覺得唔一定要咁..
點解社會上算係有活力同學識的一群人會輕易接受咁既"命運" ??
當一班中學生都肯企出黎,
大佢少少的我又在何方?
下星期一放假, 我都好想係房訓下,
但係有D野比訓覺同抖更緊要...

與雪飯聚

好耐冇同何小朋友口中的雪人姐姐食飯，

也好耐冇去機會聽你講你既野。。
感恩天父一直在我地不為意的情況下默默作工，
透過各樣的方式令我地明白相似的價值。
你說N年前我對你說過某番話，但我完全冇印象=.= (點解成日都係咁架。。) 


係聆聽的過程中，我很高興你在不同的經歷中得著改變。
一路了解住你的過去&改變, 
真係覺得好開心..
有D經歷並不是徒然的, 它們的確改變緊我地..
唔知第時你結婚時,我會唔會企係台下暗爽?
能夠的生命的一部份時間同行,感覺真好.

希望你能夠堅持並實現到你既夢啦~
能尋到並堅持自己既夢想真係好正好正..

Btw,見到你同何小朋友相處得咁好，我就放心啦。
一杯野飲，實在不足以表達我的謝意。。。

六四.二十四

今日係五月三十五日，
廿四年前的今天並冇任何特別事情發生過，
沒有人聚集，沒有人開槍，更沒有人流血，一切都很和諧。

不過唔知點解，每年既呢一日新浪小秘書都要開OT,
刪晒特定數字，爉燭既圖片，又或係生日蛋糕既圖示。

當我打呢段blog既時候, 我的情緒不太好..
每當想起當年的事既時候, 我總是很想哭..
點解一個政權會做得出咁既事?
執行者的人性去左邊?

我更想問的是, 神你係邊?
你看到傷亡學生的處境嗎
你聽到天安門母親的哭聲嗎?
父呀,你聽到我們的疑惑和禱告嗎?



Lunch時一路係office聽住呢首歌,很多的情緒就不住湧出來.
歌詞提醒緊我要時刻相信上帝掌權..

在你寶座前，是我藏身處，

你必以得救的樂歌，四面來環繞我， 

主你是生命的源頭，主你是永恆的真光， 

在你聖潔的光中，我得自由，必見光。  

充滿我，潔淨我，在你座座前有生命水湧流，更新醫治我。 

-----------------------------------------------
最後, 想post D野..
唔好以為市民會忘記你所講過既野..

轉載 : 林茵訪問查錫我：不貪小便宜

「香港，勝在有ICAC」，自九十年代中期起成為廉署廣告中最響亮的一句口號，也是在九七回歸大限之前用以穩定人心的承諾。

法治、廉潔，像亂世中的支柱，也是我們近年檢視香港是否還守得住的指標。與其說一國兩制是共產與資本主義之別，不如說我們有法治、廉潔，而深圳河北岸那邊沒有；但最近我們也無法再說得那麼篤定了。

在許仕仁、曾蔭權被揭涉嫌貪污的時候、在立會區會選票要幾多種幾多的時候，我們尚能對廉政公署寄予一線希望；但終於，連一署之首的廉政專員亦告淪落，我們忽然發現，再也無法相信誰。隨着湯顯明的醜聞愈揭愈臭，身邊朋友就接連嚷着，今次真的不移民不行。

查錫我卻打了個哈哈，說自己是天生無可救藥的樂觀者，「我又唔覺得好灰呀，擔憂又改變唔到任何事，不如諗吓這件事令我們得到咩教訓，點樣學習繼續向前行？」半杯水，是半滿也是半空。貪湯醜聞被揭發，他更願意理解為社會對政府的監察機制仍然有效，審計署獨立、傳媒開放的體現，「如果好似中國大陸咁講，你根本都無得監督，這是香港的優點。有這些事被發掘出來，大家以後就更加睇緊啲囉。」

「最重要是每個市民都要醒覺，要站出來，講自己心中的說話，對就對、錯就錯，維護核心價值不是靠一個人或某個團體，是所有人都要咁做。」說起來也是，廉署廣告口號，最近都已改做「香港，勝在有你同ICAC」了。

廉署模式建立了什麼？

查錫我的樂觀，除了是天性，也出於他對廉署制度的了解。廉署一九七四年成立，他一九七六年畢業就加入成為其中一員，由社區關係處做起，再轉到執行處負責調查工作逾十五年，位至總調查主任，再轉往防止貪污處任高級審查主任，至二○○四年離職，是極少數做遍廉署三個部門的人，經常向內地省市領導人講解香港的廉政建設經驗；他又非常好學，社會學、犯罪學、心理學、法律學等學歷成串長，加上執業大律師資格，可說是本地少數的反貪腐專家。

香港廉政公署的模式，常被世界稱道，香港廉潔度在國際間亦一向名列前茅。大眾說起廉署的威風，最常提及的就是第一任廉政專員姬達打貪的雷厲風行和決心，夠膽與整個警隊為敵的志氣，以及只對港督負責的獨立地位。然而，廉署之所以成為外國爭相學習的典範，除了打貪的成效，還有更為細水長流的防貪和教育工作；畢竟真正雷厲風行瓦解貪污集團的工作都集中在廉署創立的頭幾年，隨着警廉衝突尖銳化、一九七七年麥理浩發出特赦令後，便是持續多年的深耕細作。

教育防貪更重要

查鍚我說，外國相繼效法的，是香港廉署首創的打貪、防貪和教育三管齊下的運作模式，此前各國都只有打貪的執法隊伍，卻沒有專責預防貪污的機構，「我們覺得，只係拘捕、打擊貪污是不足夠的，要將人的觀念改變過來」。社區關係處負責教育公眾，防止貪污處與政府部門合作，在每個部門都成立防貪組，定期開會研究部門運作程序中的貪污漏洞，「例如如果好多人投訴CID貪污，我們就去研究CID的工作程序邊度出問題，是否有機會通水呢？咁就可能建議唔好咁快畀同事知道今晚去邊採取行動，到行動前才通知」。政府部門繁多，防貪處持續與他們檢討和建議改善運作程序，杜絕貪污機會，可說是對建設廉潔、高效的公務員團隊發揮過重要貢獻，「執行處讓你知道，貪污有好嚴重的後果，要坐監、身敗名裂，等你唔敢貪；防貪處是令你敢貪都無乜機會貪，或者貪了之後被揭發的機會好高；社區關係處，是令你就算有機會都不會去貪，因為你接受了貪污是一件壞事。這三管齊下的方法，至今在全世界來說都是最有效的機制，是最初姬達爵士等人想出來的架構」。

湯顯明事件反映制度出問題？

由廉署成立至九十年代初，短短十幾年，眾人的常識由「想要公共服務就要畀利市」，變成小孩子都知道貪污不對，所謂廉潔是香港核心價值，其實是這樣耕耘得來的。

制度行之有效，直至前特權曾蔭權涉貪，大眾忽然發現，向來形象強勢、獨立的廉署，就是無權查特首，然後前廉政專員湯顯明被揭發涉自己批自己濫出公數，人們頓覺廉政制度上原來對高層和特首全無掣肘。但查錫我不認為是制度出問題，「任何制度都係一層一層咁向上司申請，去到部門首長、廉政專員，就要自己批自己，唔通個個都去向特首申請？咁特首向邊個申請？一定會有最後一個人，唔係話向上司負責就是人治，關鍵是有制衡的制度，如果佢唔守法、唔守規矩，會好快被發覺、受懲罰，我們一向都有監察的機制，審計署去查各個部門，申訴專員公署、廉署又可以去查審計署，香港係一環扣一環的互相制衡，無一個機構係大晒、無一個機構可以超乎法律的。我們不可以因為有這件事，就不斷成立好多監察委員會，那誰去監察那些監察委員會呢？沒完沒了的嘛。」

「是個人品格出問題」

「我們的社會其實係建基於一個信任的理念，因為經濟上來說這是最符合成本效益的，如果你講每句說話我都要查過你先，你去人事登記處登記個地址，佢都要『咪住先，你個地址係咪真架？』咁咪要花好多資源去核實？去到最高層的部門首長同特首，我們亦都係信任他們，現在他們出賣了香港人的信任，濫用了他們的權力，這是個別人士出問題，而不是制度有問題，像你架車幾安全，都好難避免人為錯誤的。」

「我們成日都好想證明個制度有問題，所以出現湯顯明，其實唔係囉。」查錫我認為，有時就純粹是個人品格出問題，不要事事賴社會、制度出錯，「十幾個廉政專員得佢一個係咁樣，你話除了佢品格問題仲有無其他問題？我就諗唔到喇。如果回歸後第一個專員就係咁，都可以諗係咪換了政權就變了呢？但佢又唔係第一任，前任李少光無問題，白韞六到現在都未睇到有問題呀。」

廉署降格專員人選出問題？

但有些趨勢，確實朝着不太理想的方向發展。查錫我認為，廉署地位近年不斷降格，這一點，體現在廉政專員人選的轉變上；早期的廉政專員都是本身很高層的司局級官員調任，做完廉政專員便退休了，「問題是回歸後，由李少光開始，就不是AO出身了，是由其他政府部門調過來的，李少光和白韞六都是入境處，湯顯明就海關。我覺得廉署成立已三十九年，還是否有必要從外面調人來做呢？你話調個AO來我都仲可以理解，AO本身個個部門都去，有足夠的政務經驗，但你調其他部門的首長來，人們就覺得，其實廉政專員的職位是跟入境處處長一樣級數了。廉政公署的調查能力肯定係高過入境處、甚至海關啦，由一個調查能力低的部門首長過來做廉政專員，係好奇怪的。而且，如果你由內部晉升，佢一路做到退休走，就不會再加入政府了，現在李少光由入境處長來做廉政專員，做完後佢就去做保安局長，有些人會疑慮，『你做緊廉政專員時會唔會盡量唔得罪人？』可能實際上無咁做，但如果你之後又入返政府，市民觀感上就會覺得你難以維持獨立性。」

回歸前已跟內地交往

湯顯明被揭醜聞，又連日龜縮，不少現任前任廉署人員非常憤慨，都將他跟廉署劃清界線，強調「湯顯明不代表我」。查錫我說，廉政專員的角色一向不涉及實務運作，同事在查什麼案，不需要向專員交代。廉政專員由姬達開始，都是對內鼓舞士氣、對外頂着壓力，定時向港督匯報、向立法局和公眾交代的角色；至於跟內地的交往，則在回歸前已有，「因為中國大陸跟香港接壤，好多人貪污後走去大陸，就要透過國內的檢察院、反貪局去協助我們追捕。九七後有了中聯辦，都會透過中聯辦去聯絡某個省市的反貪人員，不止是中國大陸，新加坡、馬來西亞，任何國家都有這些互相協助的做法。與內地官員飲宴也不是好特別的事，有時他們過來做嘢，我們招呼佢食飯，我們上去，他們招呼返我們食飯。問題係，係咪要送茅台酒、XO呢？以往就無聽過囉，我在廉署做的時候，一般來說就是送條廉署的呔呀、紀念盾呀、或者送一兩本廉署的年報呀，咁之嘛，從未聽過要送茅台、XO的，這是湯生自己開始的事。」

回歸前後有品與無品

「其實調返轉頭諗，我覺得根本上唔值得咁做，如果你問返湯顯明本人，我諗佢都悔不當初。講真，香港社會對得佢住啦，廿幾萬一個月；現在揭出來的使費都只是幾十萬，在五年入面，幾十萬算咩錢？我當你一年使十萬，在你年薪成三百萬入面拎十萬出來有幾難？你自己畀都得啦，何况我諗其中都有些是正式可以claim的，根本唔值得囉。但你睇佢，同中聯辦一位女士飲咖啡，五十六蚊佢都要claim，無品囉，差勁囉，我唔係話佢無權claim，係嘥時間。我們好多時出來同人傾偈食飯，希望拎些資料，食餐飯我們請，無預先申請就無得批，都係自己荷包出。」查錫我念念不忘，回歸前跟執行處長史道偉到東南亞出差，處長有權坐頭等，他同行，也可以一起坐，但處長反提議一起坐經濟位，替政府省點錢，「佢高我成個頭，六呎幾，屈住對腳，但佢覺得只是個幾鐘飛機，辛苦少少，慳點錢啦。其實英國人做乜要幫你香港政府慳錢？應該使到你盡呀，佢唔係，這些我哋咪敬佩囉，從前我們的專員、處長都是這樣的。曾蔭權就剛剛調轉，去到巴西，個山景都話唔要，要對住海景，就算你可以使，都唔應該咁樣使錢法嘛，你問問自己，如果是出自己荷包會唔會咁使？做人的品格，分別就在這裏，曾蔭權就是無品嘛，湯顯明亦都無品嘛。」

意志軟化

跟罪案打交道的這些年，查錫我看得清楚，貪污，很多時就只是由小便宜開始，「開頭可能我請你食飯，款待之嘛，無問題的，但款待完後請你去夜總會，夜總會之後就慢慢來；或者打麻將借點錢畀你，你以為麻將數而已，借借吓就出問題了。其實無人鍾意貪污的，但就因為一開始時被人軟化了，將你的意志軟化。你以為食餐飯無事，跳吓舞無事，慢慢就出事囉。所以做公務員也好，在廉署也好，係要好均真，做事要經常提醒自己，條界線喺邊度。」

文 林茵

圖 林俊源

編輯 蔡曉彤