轉貼 : 睇教會，識睇一定睇書櫃

我都好鐘意睇唔同教會既程序表,XD
認真睇既話,真係可以了解到教會入面好多野~


-----------------------------------------

睇教會，識睇一定睇書櫃

有說，一個人的房間是他心靈狀態的反映。那麼，一間教會的環境，某程度上，亦反映所屬信仰群體的一些氣質。我不是說教會要大要靚，那只是膚淺的外表。要看一間教會的氣質，不妨由她（教會會用女性她，求解）的書櫃開始觀察。書櫃也者，不限於放書的地方，也包括放CD、DVD、錄音帶的「影音櫃」，也包括放雜誌刊物的雜誌架。另外，從教會張貼出來的海報宣傳，亦可窺教會的氣質。先談書櫃。

一般教會都會設一個書櫃，放些基督教書藉（aka 屬靈書）供信徒借閱或在教會內參考。你可以從兩方面觀察，第一是書櫃借還是否頻繁，第二是它提供甚麼書。書櫃交易暢旺，即教會閱讀風氣盛。有些教會會專設 librarian 負責，有些則自助。我話你知，梗係有 librarian 果ｄ教會係有心搞圖書櫃啦。我知道呀，有間教會既 librarian 係週間夜晚回教會圖書館當值等人來借書架。呢ｄ咪有 heart 搞圖書館囉。

另外當然要睇佢地放咩書。如果你唔識分咩書好咩書唔好，唔緊要。總之，有新書好過無。有ｄ教會個 library ｄ書真係古卷咁架，得ｄ八十年代的書。咁唔係代表懷舊或者重傳統喎，係代表你個圖書館無 update 咋喎。另外，睇吓佢地入咩出版社既書。入基道呀、校園呀、明道社呀、文藝呀，就幾好。如果係入大量以琳呀，咁咪賴野囉。除左屬靈書，睇吓佢地擺左幾多聖經譯本，多一定好過少，又原文則更佳（雖然ｄ原文可能都係 for 傳道同工 internal use，但係都好丫～），如果得本《啟導本》，咁就賴野嘞。如果有「馮象」就爽歪歪了（個人品味）。此外，如果，教會圖書館最深果本書係《標竿人生》，咁得嘞，唔駛睇。還有，有些教會圖書櫃會有《末日迷蹤》系列小說，有呢，你就可以評估呢間教會嘞。嗱，愈少，呢間教會愈好。一本都無，最好；有齊一套，大劑。點解？因為呢套小說解啟示錄真係亂來的，如果教會覺得無問題，咁係有問題囉anyway，簡單來說，觀其書櫃而知其教會氣質。

另外，也要看牧師/ 傳道的書櫃。如果牧師房最深果本係《聖經．啟導本》，哈～死得。有一次，我去到見到個牧師間房有幾本 Marva Dawn，幾本古倫神父，我就知我同佢啱傾，結果，真係，好好傾。相反，如果牧師房有好多咩《直奔標竿》呀，《一針見血的福音》呀，《價值觀重整之旅》呀，咁你要關心下佢，點解會睇ｄ咁既書。可能阿牧師係想找出書中錯謬，that’s fine。但係，牧師如果話想拿來作小組教材，咁你可以明白，他的品味需要重整。嗱，又如果你係牧師房見到《令人噴飯的謝飯》你唔好開心住喎，佢可能係想找出書中錯謬架喎。仲有一樣，有ｄ牧師會成套釋經書擺出來（好似ｄ律師行ｄ law 書咁），你會被其磅礡的氣勢嚇親，但係唔駛驚，你要留意下佢套書係愛黎擺定係愛黎用，擺既話，唔駛驚。（講開又講，我識得個牧師，有成套 WBC擺住唔用，我應該求佢送俾我。我會用的。）觀一人之書櫃，能大概知其氣質。原理實在是簡單。

到影音櫃。第一原則：影音不宜多「影音」，特別係《挪亞方舟驚世啟示》。如果一間教會有《挪亞方舟驚世啟示》1，咁即係佢地唔小心上左一次當。但係如果間教會有《挪亞方舟驚世啟示》 1同 2呢，咁即係佢地連續上了兩次當。咁你要評估這間教會領導人的判斷力問題。影音櫃還有一點值得留意的，就係有ｄ教會的影音櫃有鋪滿一牆的 80 年代錄音帶，例如有經典的溫偉耀《作個八十年代的屬靈人》，咁你會知道，呢間教會係仍然相當希望他們作個八十年代的屬靈人。無問題，但你應該問吓有關人士，教會有無得借埋 walkman/ boombox.

到雜誌架了。原則一樣，擺咩出來反映他們是甚麼人。有些教會愛擺神學院延伸課程資料，或者係外間講座資料，相當好。有些教會，會掛 $6.1 banner。咁佢地就係果ｄ擁抱 $6.1 的人囉。無野既。有一次我去一間教會，多手看看他們的雜誌架，放面頭的竟然是一本 2008 年的《天使心》，OMG，你應該加張 notice 叫人「小心輕放古董」。有些教會則沒有甚麼外間聚會資訊，但到處貼教會小孩的手工作品，我覺得都無咩關係，都係果句，從這些細節，會看到教會的氣質。

最後，看一看他們的週刊。教會週刊就咁睇係一份程序表，但細看其實有好多野可以睇到的。週刊之於教會，如同卡片之人。從卡片你可以略略認識一個人，從週刊，你可以略略認識一間教會。舉個經典的例子，善樂堂本週刊，每週出紙 64 頁，內有大量新聞、評論、教友寫的文章、上週講章 full script，你會見到她們投放很多資源做好本週刊，本週刊真係可以睇一兩粒鐘而且係牧養到你的。但係呢，我又見過ｄ週刊係連最基本的 alignment 都做唔好的，咁又代表左ｄ咩呢？ 你自己諗。